الزمن يتواطى

شمال الزمن كلما جاه يتواطى
يرضعه الزور ويشربه الدغش
ويغير فطرة المولود
بقماطه
شمالك يالربيت وياك نعبر كل
علالي الزمن واشواطه
تذكر نحضن التنور جنا
ونشتم من البرد شعواطه
شمالك من طحت صديت عني
وقروطتني الناس قرواطه
وتدري بنفط ذبوني
عمت عينك علي تصير
شخاطه
أخوي وجنت لو ثوبي انفتق
تلظملي اخياطه
دغش وانت ادرى بيها شلون
لادين وبلامذهب
بس وياي
محتاطه
عمت عينك يهالخوه
أمردت قلبي وكسرته وعثت
بانياطه
يالتعرف حجينا وشنهي رباطه
شضرك لو جنت عالتل
ترمي اهنا وترمي اهنا
مثل مروان وانماطه
شضرك لوجنت بالنص
والحق لابد يبين
يرفع ناس ربك
واليضد الدين
يتواطى
نفرض لو جنت غلطان
مو جان اولى بيك
تشيل اخيك
تستر اغلاطه
وما ظن بالبشر معصوم
غير اربع طعش
ياهيه
كلمن يفتح اجناطه