بمناسبة غرق 160 عراقي في المحيط الهندي وهم متجهين الى أستراليا عام 2007
|
عـجـزت مـاتـلـفيهم بلادين
ولاغـيـر الـمشو للستر غايات
وطـنـهـم غابة والحكام واطين
والـنـهـران دم مـن الضحيات
خـذو حـفنة هوه وحفنة رياحين
تـذكـرهـم زغـرهم والمسرات
تـذكـرهـم والـيـبعدون ناسين
ولـلـيـمرض فلا قالو سلامات
خذو تربة علي وجروه من الحسين
ودعـاء الام نـحيب ويالزيارات
يـنـشـدهـم وطنهم وين ناوين
تـقـطـعون الفيافي وهالمسافات
مـشو لاجن مشو مامش غراضين
مـشـو بـجيوبهم بس الجوازت
لـفـو عـمـان بهدوم المساجين
وضـاقت ماكو بالاردن مجانات
تـلـقـتـهـم تراحيب المجرهين
عـراقـيـيـن تسمع هالعبارات
لاحـرمـة عـرب لاحرمة الدين
ولا لـلـجار من ينضك كرامات
ولاخـطـار جـنهم ناس غازين
عـمـت عينك ياجار شلون بذات
الـوكـت ذبنا علبيبان السراحين
مـن المر صرنا نمشي عللمرارت
مـشـو لاجن مشو لاوين ماشين
مـتـعـنـيـن اويـلي عللمنيات
بـنـو آمـال واحـلام وبساتين
ومـشـى بـيهم قدرهم للمتاهات
قـصـدوا جـار الـمأملينه يعين
كـثـيـر البي لحايا وبيه صايات
عـودن بـلـكت الله يجيبهم دين
وطـلع مامش فرق بين المرارات
مـتـعـنـيـن لـلـكفار ماشين
الـيـلـفـون الـيجوهم بالتحيات
ركـبـو ركـبـة مدافع بالايدين
ومـايـدرون ويـن الهم نهايات
بـبـسط الماي اجتهم روجة البين
بـلـيـل اظلم ولاتنشاف ضويات
تـفـوي اجـسامهم جنهن قرآين
وتـسـمـع من بعد ترتيل الايات
سـلام الله عـلـيـكم يالمظعنين
ثـواب وفـاتـحة ودمعة وتحيات
|